مارک گێی: هەڵبژاردەی دیکۆ بۆ هێڵی بەرگری بارسا

پێکانە سەختەکەی ئەم دواییەی ئەندریاس کریستنسن لە ئەژنۆی چەپیدا، پلانەکانی یانەی بارسێلۆنای تێکداوە. بەهۆی دوورکەوتنەوەی ئەم یاریزانە دانیمارکییە بۆ ماوەی چوار مانگ، هانزی فلیک و کارگێڕی تەکنیکی یانەکە پێویستیان بە چارەسەری بەپەلە هەیە. هەرچەندە بۆ مێرکاتۆی زستانە بەدوای بژاردەدا دەگەڕێن، بەڵام پلانی سەرەکی بۆ هاوینە، تاوەکو ئەو بۆشاییە پڕ بکەنەوە کە ئینیگۆ مارتینێز دوای ڕۆشتنی بۆ خولی سعوودی دروستی کردووە.

لە لیستی کارەکانی دیکۆدا، ناوی وەک شلۆتەربێک و پاو تۆرێس دەبینرێن، بەڵام بژاردەی یەکەم و بێ رکابەر مارک گێییە. ئەم بەرگریکارە بەتوانایەی یانەی کریستاڵ پاڵاس و هەڵبژاردەی ئینگلتەرا، بەهۆی ئاستە بەرزەکەی و بەتایبەتی بارودۆخی گرێبەستەکەی سەرنجی بارسای ڕاکێشاوە؛ چونکە لە ٣٠ی حوزەیراندا گرێبەستەکەی کۆتایی دێت و دەبێتە یاریزانێکی ئازاد.

هەرچەندە بارسا خەون بە گواستنەوەی دەبینێت بەبێ بەرامبەر، بەڵام ململانێکان زۆر سەخت دەبن. یانە گەورەکانی وەک لیڤەرپوول، بایرن میونشن، ڕیاڵ مەدرید و مانچستەر سیتی چاودێری دۆخی ئەم بەرگریکارە دەکەن. هەرچەندە لە یەکی کانوونی دووەمەوە گێی دەتوانێت بە ئازادانە دانوستان بکات، بەڵام ئۆلیڤەر گلاسنەری ڕاهێنەری ڕایگەیاندووە کە ئەم یاریزانە تا کۆتایی وەرز لەندەن جێناهێڵێت. چیرۆکی گواستنەوەی ئەم ئەستێرە ئینگلیزییە هێشتا لە سەرەتادایە.