ڤینیسیۆس؛ ئایا لە ڕیاڵ مەدرید دوور دەکەوێتەوە؟

پەیوەندی نێوان ئەستێرە بەڕازیلییەکە و هاندەرانی مەدرید لە دۆخێکی باشدا نییە و دەنگۆکان دەربارەی داهاتووی ڕۆژ بە ڕۆژ زیاتر دەبن.

ڤینیسیۆس جونیۆر، لەو کاتەوەی بە شێوەیەکی چاوەڕواننەکراو خەڵاتی باڵۆن دۆری وەرزی ٢٠٢٣/٢٤ی لەدەستدا، لە ڕووی وەرزشییەوە لە پاشەکشەدایە. ئاستی نزمبووەتەوە و ئەمەش وایکردووە ڕەخنەی توندی لێ بگیرێت لەلایەن میدیاکان و جەماوەری یانەکەوە.

لە یاری ڕابردووی ڕیاڵ مەدرید بەرامبەر سیڤییا، کاتێک ڤینیسیۆس لە خولەکی ٨٣ گۆڕدرا، هاندەران بە فیکە لێدان ناڕەزایەتییان بەرامبەر ئاستی نیشاندا. کاردانەوەی یاریزانەکەش خێرا بوو؛ وێنەی پرۆفایلی ئینستاگرامەکەی گۆڕی و وێنەیەکی بە درێسی هەڵبژاردەی بەڕازیل دانا.

کێشەی نوێکردنەوەی گرێبەستەکەی ئەم کێشانە لەگەڵ پرسی نوێکردنەوەی گرێبەستەکەی هاتوونەتە پێش، کە ماوەی ساڵێکە ئاڵۆز بووە. باس لەوە دەکرێت ڤینیسیۆس داوای مووچەیەک دەکات هاوشێوەی مباپێ (نزیکەی ٣٠ ملیۆن یۆرۆ)، بەڵام ئامارەکانی ئەم وەرزەی (٥ گۆڵ و ٧ ئەسیست لە ٢٤ یاریدا) وایکردووە یانەکە دوودڵ بێت.

بەو پێیەی گرێبەستەکەی تا ٢٠٢٧ە، ڕیاڵ مەدرید ڕێگە نادات بە خۆڕایی بڕوات؛ کەواتە یان دەبێت گرێبەستەکەی نوێ بکاتەوە، یان لە هاوینی داهاتوودا دەفرۆشرێت.